حزين




مرعوشة الايد الممدودة
ليه مسدودة
شبابيك الضى
و بحاول و بعزم افتَح
لكن بكراك
يا حزين مش جى
واقف بتنوح؟
ايام و جروح
ولا فاضل منى و م القصة
فتافيت همسة
وحلاوة روح !!

هناك 11 تعليقًا:

غير معرف يقول...

مرعوش الايد الممدوده زي الدخان !!
مفروده بوسع الكون ..
بتهون وتمـــوت أحزان !!
مرفوض تتمس ورعشتها مكتوب ما تبان
ماسكه ف قلمها .. وقشتها !!
ف بحور الآه ..
كلمة إنسان !!

ـــــــــــ

أ/ سمر
أنا بحب اقرا شعر ..تصدقي !!..
بجد بحب اقرا الشعر المكتوب من منطقة الاحساس وبعرفه لو حتى لحد مبتدئ وبحبه أكتر من حاجه مش محسوسه ...
لكن في أعمالك (الراقية ) فيه منطقة بعييييده في الإحساس بتوصليلها (ازاي معرفش ) فتتصدقي بمنتهى السهوله ، فتبقى القراية ليكي ممتعة للإحساس حتى لو (حزين)

تحياتي وتقديري

هاني رمضان

ـــــــــ

محمود سلامة يقول...

حلاوة روح
بتموتني الكلمة دي يا سمر

راندا رأفت يقول...

مبروك يا سمر المدونة
انا عارفة انها جت متاخرة
بس هي عادتي ولا هشتريها

بجد المدونة حلوة جدا ورقيقة جدا ورومانسية جدا

تحياتي

ســمـــر احمد يقول...

ومن قلب دوامة وجع
بمد الاه وووراها الاه
دانا قلبى جريح
و الكون ما حواه
ولا قادر اتهجى الفرحة
و لا اعيشها حياة ...
***
الشاعر المتالق هانى رمضان
قرايتك لنصوصى سعادة للنصوص و لكاتبتها

مودتى و تقديرى الكبير

ســمـــر احمد يقول...

حلاوة روح ..
مهى الدنيا دى نداهة
ومتفاتة .. و ريحالك منين ما تروح

الشاعر الرائع
محمود عبد الله سلامة ..
مرور جميل جدا

ســمـــر احمد يقول...

ولا كانت المدونة عمرها تبقى حلوة ولا رقيقة من غير طله البسمة البريئة و القلب الطيب يا رنوود
محبتى يا جميلة

محمود عبد الله سلامة يقول...

مخنوقة الإيد الممدودة
والكون همدان
ملمومة على الكسرة اللي بدتها سنين قدام
والناس تنداس ولا عاش فيهم غير الإحساس
والقهر احتاس مش عارف يخرج من بيتهم
ولا ليه عنوان
مخنوقة الإيد البردانة بتقول يانا الموجوع عمرين
وتدور بالدور في طابور النور لما الضلمة سكنت جواه
بتقول الأه
ملعونة الإيد اللي اتمدت تشحت لقمتها من اللي سرقها وعاش شبعان
مخنوقة الإيد الممدودة
والكون همدان

،،،،،،،،،،،،،،،،،،،،

سمر إنت شاعرة رائعة فعلا
كل اما ارجع لكلامك ألقاني عايز اكتب وبمسك نفسي عن الكتابة احتراما لمتصفحك وليك ولموهبتك
لكن المرة دي ما قدرتش

ســمـــر احمد يقول...

ggعلى ناصية الوجع الاخرس
واقف حلمى الخواف..
وايديا الساقعة المرعوشة
ممدودة ولا بتتشاف
زمن العطش فرع ...
وانا متمزع ...
والناس اصداف
صدقنى بخاف
تطلع اهه غضب عنى
يصدق ظنى
و الاقى الجار اللى ف ضلى
هو السياف ...

الشاعر المبدع محمود عبد الله سلامة

ياريت ديما تشرف مدونتى بكلماتك الرائعة و ابداعك المتميز ..
حقيقى اسعدتنى جدا

غير معرف يقول...

مدونتك رائعة .......
وادعوك لزيارة مدونتي همسه شاعرة

ســمـــر احمد يقول...

اهلا بيك يا مريم نورتينى ...
يسعدنى و يشرفنى طبعا زيارتك بس فين لينك مدونتك؟

غير معرف يقول...

سلام سمر مدونتي في مكتوب يمكنك تزوريها او اعطيكي الرابط وهو
meriemch1992.maktoobblog.com
همسة شاعرة