القطر خلاص عدا

لم عزالك و الكركوبتين

هاتروح على فين ؟

و القطر خلاص ... صفر عداا

او لا عمره ف يوم عندك ... هدا

مرمية احلامك ع الصفين

و النور بالضلمة بيتوضا ...

طراطيف الدمعة بتتنيها

و تخبيها

و ف كم الوقت بتمسحها

ليه تسامحها ؟

الدنيا القاسية و تديها ؟

و ف شواشيها

متعلق ظالم يتمرجح

و انت بتدبح

الاهه ف قلبك من جوة

لو يوم مد الشوف لبعيييييييييييييد

واستسمح بكرة المتعنطز

انه يشاور ليك بحنان

او حتى تلاقى فى زحمة مكان

او نسمة تعدى و تندهلك

طب فين اهلك

اوعاك تهلك

وانت بتدور ع الاسباب

لم عزالك و خيالك

و الغنوة الملهوفة ف صوتك

و الحبر المتبعتر على سطر القلب

و الدفا و الغلب

و النجمة السرحانة فى كفك

انت ف صفك ؟

ولا بتنادى على المجهول

وانت المسئول

لو يوم صادفك

بتقول حقك ؟!!!

طب مين شافك او مين حسك ؟

عينك .. حسك

تشابى على فجر مشقشق

وتقول.. ليا !!!

او تلقى عصفورة تغنى

و تقول هيا !!!

او تحلم وبسوق العيش

تملا عيونك

كله يخونك

لو يوم يلاقوك واقف وحدك

الزم حدك !!!

و اياك تتسند ع الجدران

و تحاول ليه تترك ركنك

هدك حزنك؟

مهو هد كتير وكتير قبلك

ياللا استغفر

و اغسل وشك بشوية صبر

و استنى القطر

بس القطر خلاص ... عداا