اخر نقطة ضى

اخر نقطة ضى
هناك
على مدد الشوف

قلبى خلاص
ما بقاش ملهوف

زى ما كون واقفه فى طابور العيش

و الرغيف عمره ماهو جى

حى ..على الرحيل
يا ليل طويل
قمره راح
ومالهش زى
***

(هرحل ماجيش )

سرسوب حنين بيشدنى

اعطش وادوب لكنى

ارجع انتهى

واقول هاتوب
وويا لحظة للغروب

القى القلوب
(بعيدة عنى كلها)

وكأنى نخلة فى الصمود

بياكلها دود

وواقفة جامدة

و ليه النهارده
بقى ليها صوت

هسكت .. هموت

و لا عمرى حتى هنتفض

هبتعد
بس فى سكوت

زى اخر نقطة من ضيا

خانقه الغيام

واقول سلام

على كل لحظة للفرح

وعيون حبيبى

و البكا
بيحوش ضياه

مين التقاه ..؟

مرة فايت من هنا

يمكن انا

كنت السبب

كنت الوجع

كنت الحياة

كنت النجاه

وكنت اخر طير مهاجر فى السما
اه يا انا

يا ضايعة بين الاه و اه

يا ضايعة بين حضن النحيب

و الهمهمة

يا ضايعة بين حرفى و صمتى ..و الضنا

وزارعة حبك سوسنه

طرحت ليه صبر ومرار

دابحنى صمت الانكسار

والانتظار

ما صبحش حالة ممكنة

وكلمة انا

وكلمة هنا

وكلمة ياريت

يا للى قلبه كان براح

و كان هنا

و كانلى بيت

خلاص نسيت ؟

يا قلبى ما تسكت بقى !!!