على الدكة

يا اما اشتهت خطوتى تلقى لعينيك سكة .. 

تمد بوحك غناوى .. تملا القلوب ضحكة  

عبرت ليك القنانى بقلب غاوى

لقيتنى فى لعبتك ,, 

مركون على الدكة

بلياتشو 2

وعينيه المذلولة ما بتشوفشي

و(حمار) !!!

بيعدي لهاليب النار

حرقت روحه

وما صرخشي

نشانه هزار

تايهة (عباراته)

ما بتصيبشي!!!

شاعر؟

بلياتشو؟

سراب تايه؟

انا ما اعرفشي


******


ف القعدة كان درويش

وكان ساحر

وكان قادر 

ع السعي بين صفا زايل

وبين قسوة

وكان يطربه التسقيف

وكان ف مشيه ع الاحبال

ولد حريف

لكن جمهوره كان مشغول

ومش مسئول

عن قلب و حرفته المه

يلون بالكلام همه

ويرسم ع الوشوش بكرة

بلياتشو 1

كام منا صحيح خانها

دمعة البلياتشو المقتول حزنا ..

فى اخر ضحكة الجمهور ...

****

و الشاعر صحيح فنان

لكن حرفة جمال صوته

ما نعة حروفه تتحرر

من سجن الغنا الدافى

فتوصل حرقة الصرخة

لابعد حد للاصرار

يبوح/ ساكت

ينوح / متبسم الدمعة

ف وش قرار

مانيش راجع !!

يا اغلى حته من قلبى

يا شوق و مرار ..

وفوق ترابيز صحيح عالى

لكن واطية اوى حيطته /

باينة كمان اوى خيبته

هايتنطط

وهاتسقف ايدين باردين

ومش شايفين

غير لحظة و هاتعدى

يسقط !!

ومين يهتم

يعلا ..

صحيح ع الغم !!

ومش فارق ...

لكن عدا ..!!

سيفك خشب

وف مثل هذا اليوم من اكتر من وجع...


تصميمك المجنون...رجع


ف مثل هذا اليوم 


وانت بتواسي النجوم


وبتعترف..

ان القمر.. كومة هموم

وقفت هناك فارس وحيد

ماسك سيفك خشب

كان الطوفان شديد

كان فرسك عتب

مشدود بقيود حديد

ما بتنفعش الجسارة

وقت وقوع الخسارة

سلم..

وحاول

تبدأ من جديد

وحدك ..المك

و قال الموجوع زمان

لو جاك الهم طوفان احزان

حط المك تحت قلبك

رجليك مجداف مشلول

و البحر عويل

ما متحمل يا جريح تعليل

ولا قادر ع السطر المتقال .. قهرا

و المتعنون بدموع بتبوح

و لا عمر ينوح

خليك صالب للريح طولك

يسكت قولك 

يفضل بوحك من غير اشهاد 

ولا دمعه مداد

 كالنخل الصابر 

صامد وحدك

تيه

ان تبحث عنك فيك ... ان تلهث! تلهث !
و يصير عدوك فى فراغ احزانك
 ضرب من جنون ادمنته و ادمنك
 و تصمت فتمل منك الحروف المنسابة على جدار القلب المنهك ...
ان تصبح لائما ملوما محكوما
مظلوما و ظالما يحكمه هواه
و يضيع فى التيه نداه .. 
ان تصبح احزانا ... الوانا ... 
الحانا مكسورة الايقاع ...
 فيضيق بك منك الاتساع .

بالله دعوا الشظايا
فانها لا تبغي الا التراب
حوافها المسنونة تجرحها 
وحضورها لمحة من غياب..

سيرك حياة

فقرة الجرح ف سيرك حياة 
ياللا allez hop
اتدحرج من فوق احزانك
طير !!! ما تقفش مكانك 
واقلب صوت نهنهتك ضحكة 
كمان .. اعلي
خليك باصص علي سجانك ..
ياللا يا حلو ....
روض اشجانك
اعبر لهاليب النار .... ومرار
وقرار لو هز كيانك
اوعي تفكر بكرة عشانك
بلياتشو عجوز
ما يجوز
تطمع فوق ترابيز ترقص
خطوتك المرعوشة ... بشوشة
وعيون الناس مرة ف مرة بتنقص
اوعي!!!!
حاسب!!!
حضن الوقعة تمللي يناسب
جتة ميت
لازم يثبت
انه لاخر نفسه الجي
حاول يبقي فعلا ....حي

نوووح

و بس يا نووووووح

 ما تقولشى !!!

دا كان اوهام 

هو...

و بياض القلب من جوة 

و حتى بعادى مش قسوة

و لا بالايد اكون تانى 
شبح و جريح 
ماشى بخطوة يتسند 
على التباريح 
و بيغنى 
بناى مكسور 
حتى الرقصة 
مش محسوبة بالمللى 
حتى السكة 
مش ليا 
و صابرة ياااااااااه 
و لا تشبه حنين فيا ...

ضرير

كان نهاره شيخ ضرير
ف بحر ليل تايه فناره
كان اختياره ان قلبه
يبقى عود حطب ف ناره
كان قراره انه يوم ياخد بتاره
م اللى ظلمه واللى هادى للفؤاد جرحه و سماره

غمة

ترضي دول فتبقي هم
وترضي دول فتعيشها غمة
تبقي واحدة
بادوارها امة

شوك

كان شبه الشوك النابت ف ضلال
لا يضلل و لا يدلل
ولا سكنه كان البستان ...
كان شبه الموج المتسربع
وهواه هجران .
كان اصله اعصار غضبان قلبه الكافر كان بيعافر حتى النسيان

يسجدان

يسجدان واقترب..  ... خيول ف القلب تعدو ...   يناديك خرسى  و الصبر الساكن ف مآق ليس لها  من الدمع مجير الاك يا ساكنا ف العبرات و النبضات يا سامعا لوجيب فؤادى

وينازعنى طمعى ف ما انت اهل له و خوفى من تقصيرى و احزانى فتلطف و انت اللطيف بقلب  لا يملك ان يتوارى منك خزيان

يا سامعا مالم اقله و عارفا بما يطويه كتمانى

يا طبيبا ما مسنى قرح الا و بطيب الكلم داوانى

يسجدان ... فتصير الارض جنانا و يصير الفرح عنوانى

وصل لا انقطاع فيه و سماء ازرعها كلمات  واحلق بهما  جناحين  يحملانى

يسجدان و اقترب

 اعلمكما يا يمامتى  ام تراكما تعلمانى

كيف يذوب القلب شوقا الى من لا تدركان

خايب

عاش ... يهرب من ضله المكروب

اللى ف احزانه تمللى يدوب 

يخنق احاسيسه / احلامه 

يعشق اصنام 

مكسورة قدامه 

يقيم طقس الحنين

لسنين

يرجع له صداه

تنده على مين ؟

عاش .. دايب

عاش يتمنى م الفرح

نايب

مات

خايب!!!