شراع غامق

شراع غامق/ و نيل ساكت / ووقت يمر

وانا المبلى بخوف قلبى وطعم المر

عينيا تروح للرايح

ولا تستنى ف الجايين

شراع غامق /

سما مفطومة ع التباريح

بتتخلخل عماويدى قصاد الريح

ولا مسموح لى انكسر ولا ادوب

ولا جانى قلب انا فيتوب

ولا اتعودت ع الميلة

شراع غامق و ارضى البور

تتهجى سنين تحاريق

ما تستنى

ف يوم مايهل فيضانه

هلال العيد

واقولها و اعيد

شراع غامق

و نار ف حشايا اهى بتقيد

يا بحر النيل يا مروح

ما اعرفش لفين

بتنشد شكوتك دى لمين

و انا السامع / انا الصامت

انا المتربى شوق و حنين

ما هاقدر يوم اقولها انين

فانا الساكن سكوت ليلى

وانا الشمس اللى تكوينى

وانا البذرة ومواعيدها

و انا اسيرها

وانا كسيرها

و انا الموعود بصبر يفيض