بنفسج


غريبة اوى ..
كنت فاكرة ان البنفسج
تاب عن الحلم العنيد
و انتهج سيرة وروده
و اكتفى ف نشوة شروده
انه بس يكون وحيد ..

وما بكتبش شعر .. بطلته .
و فنجان القهوة المتحوجة بالدمع
انا كسرته!!
و جوايا الموجوع ع الاخر ..
كان حلم بيحاول يسافر ..
بس مسكت ف طروفه
طمنته ... نقل خوفه
لعيونى المسكونة بصورة
مش عاوزة تغيب ولا تتاخر ..
مالية براح الشوف ف القلب
و الحضن المزروع حنيه
نداه.. دمعه ..
وشوقه اليك .. اكيد وجعه ..
و الايام مش راضية تمر


مش عاوزة اشوفك بتبكى
دمعك بيجرح الياسمين ف صوتى
لما اغنى
و اقول بحبك .. رغم خوفى ...
ومش ندر علينا السكوت
ولا حلمنا كان ابن موت ..
و القلب من يوم ما دق ...
صمم و بعزم حلاوة روحه
ما يوم هايموت ..!!!

سكووووت سكوووووووت
و اخرتها؟
دنيتنا حلوة
و ليه نفوتها؟


وع الهامش
وحشنى افرح ...

هناك 6 تعليقات:

غير معرف يقول...

(((ما لم يغَنَّ الآن
في هذا الصباح)))
لحنه هيتحوّل نواح !!
واحنا بقينا في ليالي عمرنا !
والصوت آهات
"بطلت" أفضفض للغنا
وأخترت أتوّه ف السكوت!
يمكن حروف الجرح جوّايا تموت
من غير ما تكشفني العيون
من غير ما تفضحني سطوري المحزنه!
وبرده ع الهامش !بيوحشني الفَرح
فَـ كل ورقه كتبتها
هتّبرى منها ومن حكاوي جرحها!!
وهاكتب فوق بكا وشي
ضحكة وهاصدّق كدبها
وهاتكلم بصوتي وبس !!!؟؟؟


ــــــــــــــ

Ahmed Othman يقول...

النغم الحزين
الذي لا يبرح كلماتك
العين التي نصف بريقها دموع
الصوت المتهدج بصفحتك
كل هذه الآهات التي عشقناها
آهات لا تصدر الا من زهرة البنفسج
سمر
القلم الصادق
يؤلم كثيرا
تحياتي لك

ســمـــر احمد يقول...

بصوتك /... بصوته ..

برعشه سكوته

بحلمى اللى خاننى

وصمم يفوته

على ناصية وجعى المتمرد ... ضل

و يسكت ليل حواديتى الظالم

حرف يموت ..

حرف يفوت

حرف ببسمة رضا هايطل ...

****
قالوا زمان البسمة لوية وش

باصص لفوق

يعنى م الاخر بيقول يا رب

و على هامش الهامش ..
برضه مسيرنا نفرح
ومش كدب لا بصحيح

ســمـــر احمد يقول...

اخى العزيز دكتور احمد
القلم الصادق مؤلم و الالم اللى بجد بيفرع و يطرح لما نرويه بالدموع ..
شوية شموع تنور السكة ..
و البنفسجة الوحيدة .. صدقنى عنيدة
و بتعافر رغم ان الزمن قادر


مرورك دوما يسعدنى كثيرا

sara rabie يقول...

يا ابو الروايح يا نرجس ما تهز وتر القدر

اول مرة سكوتى يرغى كده
ويزن
ويلف
ويدور
ويدوخ
يقع
مفكفك
مفتفت
مبدور كلام



ساكت!!




سمر...تحيه بوسع البحر وعرض السما الزرقا

ســمـــر احمد يقول...

كلام حالف ما يطلعشى .. و لا هقدم كشف حساب لبكرة اللى ماجاش عن امبارح اللى .. اتسرق منى

لكن يا قريبة اوى اوى يا سارة .. بجد ربنا يحميكى