عـــراف

وما تطاوعيش

حلم عبيط و متلون ..

بغنا كداب
فرد كفه ..

حنا دمعه
و شوقه عذاب

و جه عراف

ومش عارف

يقول بيشوف

ومش شايف

كتير زيه ..

دا حتى الفجر ..
اكيد خايف

***

وطاوعتك ..

وما اتفسرش

وجع حلمى ..

و اتبعتر خطاوى تدوب

فى تنهيدة حنين حاير

ما بين القلب و الننى

و كان نفسى اكون التوب

و اكون خيطه

واكون رسمه و تخطيطه

ومش بالحلم صدقنى

ولا بكلمة تطمنى

ســـــــفر

و نرسم بالالم سكة ... ما نوصلشى ..

و لما بييجى علينا الدور جايز .. ما نقدرشى

نريح على كتف الزمن حرفين

و يهرب مننا قمرنا ..

ما نسهرش!!

ووجعتنا

ياللى انت غنيت الحنين موال

وطاوعك شوقنا للترحال

و نسينا

ان السكة الف سؤال

وليه مشينا؟

و يطول السفر بيا

لا انا بقرب

ولا بيهدا انين روحى

صوتك .. حنين

و بتسند على صوتك .. حنين
****

الفجر ساعات بيتأخر ..
و يتحجج و يستفسر
الاقى الرد جى .. انين ...

ولانى بخاف
اجرح صوت دعاك ليا
ب آآآآه منى ..
اقول اسكت ...
..................
تطمنى !!
واحسك جنبى بتطبطب
على وجعى اللى خانقنى
****
و اقولهالك .. وما بقولهاش
و اكتمها ف حنايا الروح
و تكوينى ..

ولو كان فرحى ناسينى
بتشعلق ف املى ..ساعات
و اقول بكره تنام عينى
و ابقى اميرة الحكايات ..
**
وبعد شروقى الف غروب
و كل ما اتوب
يراودنى الحلم و يكرر
نداه ليا
اقول يعنى صحيح هى
الدنيا عمرها ما تدى
بس اكيد خطاويا
مسيرها ف يوم
تلاقى دروب

هايم

نبض القلب ايقاع ثابت

لو اتلخبط نقول الاه ..

و موج البحر مزيكا ..

ونوتتها تقول الله

و انا الهايم فى ملكوتك ..

و انا العايش اسير ذنبه

قريب ربه اذا ناداه

عبد فقير على بابك

ومن كرمك تلبى نداه ..

كبيرة ذنوبى و استغفر

يحاوطنى الدعا بضياه

ورق الشجر .. فضفضة برضه

ورق الشجر
يا حبه حنان مبدور
على السكة
يا دمع الصبايا بدور ..
ومش ثابتة خطاوى النور
و اه يا جرح يا جرحى
يا مصاحب حكاوى الحور ..
لو كلمة يقولهالى ...
بيبدل دموعى سرور ؟؟

وحدك و القمر مخنوق !!

مش هقدر ادخل قبر الخضوع

ولا ابكى عليك وانت مش هنا

**

وما فيش شروق بينطفى

لو جرحت دمعة بنفسج

ضل صفصاف التلاقى

و الحركة بركة

بس ف ا ى اتجاه ؟

نسيت اسأله !!

وقت التماع الدمع فى الساقية العطشانة عويل

انت ليه ناوى الرحيل

رغم انك حرقت وبايديك اخر شراع؟

مش مهم .. !!

باقى ف حضن الامانى ..

شوية فضا

يتسرسبوا فى كلامى( ندا) ..

اخرس و عاجز و يمكن ضرير

و البرد غول ...

فاكرة انه مرة قال " الدنيا ساقعة "..

و البرد هو البرد اللى بيكسر عضام الصبر

ساعة ... وفا .. ما يجيش

فمتندميش ..

لو رجعتى زى ما طول عمرك بتبقى

وحدك ..

و القمر مخنوق

سبحانه

و بلاقى ( حد ) يسمعنى و يترجم همهمة السكوت لكلام

و قبل ما انادى

يوصل لى ندا خيره

ومين غيره !!!

و القلب سايب مطرحه للصبر

يفيض احزان ..

و تتبدل ملامح زيف كل صباح

و اتبدل معاها و اقول

بان الطيبة شئ مقبول

لو ما تكونش سجانى

و الاقى الدنيا ظالمانى

و بتضلم

فبتعلم

بدمعى اروح و احكيله

الاقيى الرحمة (منديله )

يطمنى .. يثبتنى ...يقوينى

ومين زيه .. !!

ومين قده

ومين قادر كده يدى !!!!

سبحانه ..

شوية فضفضة!! كانت مع سهر و سارة ربيع

تخيلى لو السما تمطر بنبونى ...
و الشجر يطرح عصافير؟؟

و احنا بقى البشر الغلابة
يطلع لنا جناحات نطير...

عمرك جالك العيد ...
لوحده كده ..ومن غير ميعاد ... ؟؟؟

و خبط على بابك ...

بس قبل ما يمشى مسح دمعتين ؟؟؟


/////


لو الدنيا تجمد ثوانى
و ينعاد الفرح من تانى
ياااااااااااااااااه
لو اشوفه يا قلبى
و يرجع حضننا تانى ؟؟؟

////

و صحيت لصبح لقيتنى بدعيله
حلو اوى انك تفتحى عيون قلبك على دعا ..
و انت اصلا غمضيتها على فرحة .. و انتظار
و تبقى عارفه انك مستنيه حاجة ما تعرفيهاش
و ترجعى تانى يطير الهوا شعرك و غنوتك
و تقولى للدبدوب اللى قاعد فى ركن الاوضة
انت مبسوط زى؟؟؟ فيغمز لك بعينه ..
فتقولى هو انا اتجننت ؟
و ارجع اقولك
***
و تبقى انت الوحيد العاقل
وولا شئ فى الكون يستاهل .

////



طب ايه رايك فى اللى مش لاقيه مكان للبلاستر من كتر التعاوير
و رغم كده بتدور على بلاستر بمبى يمكن يخليها تشوف الدنيا بمبى رغم اللى هي فيه ؟
تعرفى دبة رجليا على الارض و انا اللى واخدة من زمان لقب (مرحوم)
بتخلينى احاول الاقى سبب يخلى خد الارض الغضبانة ما يطراش بدموعى ابدا ...
و احاول اقنع التراب اللى قافل صدرى انى محتاجة

ا ت ن ف س !!!



****


مش على الهامش بقى
نفسى اعيش !!

ومش هقدر !!

سكوت سكوت ..
طب ممكن اتسحب و ... اموت ؟؟؟

***
وف وسط المفارق .. وقفت
ورميت م العيون دمعى
ف لحظة حداد ..
ما يحتملش اى صوت ..

وهغنى

و هغنى !!!
احتفالا بالدنيا المحروقة
عند طراطيف زعابيبى الحامل
بكام نوة كده ع الطاير...
و شوية برطمة مكتومة
ومش هقول انى اكتفيت بالصمت الزهقان من وجعه
لما تزيد احمالى و اتوه
ولا هقول انى قررت خلاص اقعد على سور العمر المهدود
اتفرج ع الرايح .. و الرايح برضه ..
بس اهى غنوة ..
اتونس بيها ساعات .. و اتنرفز منها ساعات اكتر
لما الاقيها بترقص على واحدة و نص ,,
و انا مش محصلة فى الحسابات .. حتى النص ...

وشوية لخبطة و تعدى ..
و يبان تانى طريق الصبر ..
استغفر و احمده على كل اللى بيجرا
ويقولوا .....
كانت ...
ولا بلاش
خليهم ينسوا حتى يقولوا
ويكملوا باقى الحكايات
و مافيش ولا فتفوتة ذكرى
هاتفضل ليا ...
الا .. الغنوة .. اللى اكيد خنقانى

ليه؟

وماشية ف حيرة بتلفت
و بتفتت
لو يوم طار الحنين صوتى
لحضن القلب ما رجعشى
وسالت عليك
وليه انت .. ما رديتش؟؟؟

صباح ... ال ..جنة

صباح ناعم ...صباح جنة ...

وورد خدود بيتحنى

ودعوة صافية من قلبى ..

بان حبيبى يتهنى ...

صباح ياسمين على عيونك

دا اللون الفجر من لونك

يا ساكن كل اهاتى

و قلبى حرير و مجنونك ..

صباح اخضر كما قلبك
عيون صافية و بتبادلك ..
حنين ب حنين .
و مين قدك ؟؟

بنفسج

غريبة اوى ..
كنت فاكرة ان البنفسج
تاب عن الحلم العنيد
و انتهج سيرة وروده
و اكتفى ف نشوة شروده
انه بس يكون وحيد ..

وما بكتبش شعر .. بطلته .
و فنجان القهوة المتحوجة بالدمع
انا كسرته!!
و جوايا الموجوع ع الاخر ..
كان حلم بيحاول يسافر ..
بس مسكت ف طروفه
طمنته ... نقل خوفه
لعيونى المسكونة بصورة
مش عاوزة تغيب ولا تتاخر ..
مالية براح الشوف ف القلب
و الحضن المزروع حنيه
نداه.. دمعه ..
وشوقه اليك .. اكيد وجعه ..
و الايام مش راضية تمر


مش عاوزة اشوفك بتبكى
دمعك بيجرح الياسمين ف صوتى
لما اغنى
و اقول بحبك .. رغم خوفى ...
ومش ندر علينا السكوت
ولا حلمنا كان ابن موت ..
و القلب من يوم ما دق ...
صمم و بعزم حلاوة روحه
ما يوم هايموت ..!!!

سكووووت سكوووووووت
و اخرتها؟
دنيتنا حلوة
و ليه نفوتها؟


وع الهامش
وحشنى افرح ...