عفوية تجن !!

لو تسمح

مش كل شوية ألاقيك قدامى

بتلاعب شوقى الحيران

بطفولة ..

وتخايل قلبى الغلبان بالصمت

لو تسمح سيبنى انام ..

من غير ما اسألنى

فينك؟؟ او عامل ايه دلوقت؟؟

وياريت لو ممكن ..يعنى ..بجد

تلملم اغانيك و كلامك ..

وكمان ضحكتك الغيظانى

من فوق حبل ذاكرتى الممدود اوجاع

و بلاش يعنى تصمم

وبعفوية تجن

انك تحدفها ف وشى

مع إنك متاكد جدأ

إن ...................

.........................

...................

بحبك

اوى

كده ليه؟؟؟!!!!

اسفلت

ما سمعتش
صرخة قلبى الأخرس
وانت بتعدى الشارع
مش شايف انى اتوحدت مع الاسفلت
مافضليش
غير بس مدامع ...
وبقسوة .. وسرعة غريبة
جريت
من فوق العمر المتكفن صبر
ووقفت هناك
ومعاك الوقت
وهاقولك ايه
كان أصعب جرح
ولو انه ماكانش
غير كلاكيت
لمشهد موتى
للمرة ال....
تصدق مش عارفه الكام؟

انا حرة !!

وانا حرة ما اصدقش الحلم المكسور
لو اتعكز على اخر سور
بنيته عشان احمى دموعى
تموت م البرد ...
وانا حرة ما اكونش اللى تكونه ...
و اللى تعوزه
و اللى هاترضاه ..
فاكر
اول مرة اقولك لأة
و الظاهر
كان لازم اقول
واعصر جوايا الدايب حنيه
واجبره ع الصمت
وانا مالى اذا كنت اتجننت
و رضيت بالكبت
و رضيت انك تبقى لوحدك ..