شفرة

فك رموز شفرة بعاد .. 
واقف علي صخرة عناد ..
ف عيون حبيبته الطيبين .. قال مرتاحين ؟
 لو كل يوم بيزيد حنين 
طارح علي ضفافه الشجر
 موسم مطر 
هايهل مهما دام عطشه السنين

احساس غبى

احساس غبي كان يعاند الحياة
 لو صورت له (بعاد) نجاة 
كان يعافر الظرو ف
لو دمعه عماه يشوف
 كان ف بحر قلبها مجداف وطوف

قلبك عجوز

ظلمهم قلبك العجوز 
ممكن /يجوز ...
 يعوز ينادى ضلهم 
و هم العابرين ع المدى 
  على قلبهم تنده ..تلوشذ ؟ 
دا حضنهم مخنوق 
من قسوة  بعدك المحسوب
 على زمنك الرايح جرايح ...
 وروايح  زمانهم الفايت
لدموعك السايلين كنوز ...

....

وبعد المفتتح .. هاتروح تنوح

ولامش مسموح تبوح

طب خللى صبرك جمايل

ومايل يا حال الدبيح لو يدعى القوة

فتوة!!!!

وقادر تعدى المستحيل؟

طب ميل

ده حبهم غنوة

ودموعك المواويل

-------

قلبك كان حصان حالم
جاله الزمن خيال ظالم ....
لجم صرختك غياب
ف سراب
ف تسبيله عين 
تقول
" الحمد للى يستاهله "
و" الحزن بس ف بيوت اهله "
"ومش اكيد اللي يصبر ينول
شاب صبرك على افتعال الصمود
لو هاجمت حصونك نوة
من عصر جليد
تقيد الدمع ف مباخر القلب
تعطر جدران ذاكرة الحنين
بانين
صاحى رغم سبات الابتسام
و هوانك على الفاكرين
انك القادر و العاتى
و المسكون بانتقام ...
ولا يهمك و ايه فيها ...
و تعيش / تموت يعنى
و عيونك الدمع ماليها ...
و يا بخت اللى انظلم ....
جملة مكسور قلبك
وماهوش ليها ...

( ضحكة يتيمة مبتورة الفرحة)

حامل !

حامل ف كام وجع وهزيمتين ... تلاتة 
ساهل تنظر / تهزر او حتى تبتسم .. غتاتة 
حامل فى غيظ بيفرتك بدن .. و بيترسم وش العباطة 
حامل ف ااااااه ماليها الشجن وصابرة جدا 
جدا باستماتة

سلم تعبان

سلم .. تعبان ..والفعل جبان ..
قلبه المقفول ديما كسلان 
مكسور ..غلبان يهرب رهوان
يعشق :يتخان يرغي وزنان
يكذب :فنان/ يغطس ما يبان
سلم تعبان ..ما انتاش غلطان
وفصيح جدا / يابو نص لسان

غنا وسكوت

ايامهم بتشهد كام ميلاد و موت


كام مرة غنا و...سكوت


كام مرة طار الجناح ...سقوط


كام مرة هزم الصراخ ...خفوت


كام مرة قطر الحياة ...يفوت