فصل

وفصل م الوجع توبين 
وقص الحزن على مقاسك
وحيد جدا ..تسال فين ناسك
وبينكم  يا دوب اهو  مترين

كالحة

صباح وجع عطشان
 ما ترويه دموع مالحة
ودنيا كانت الوان
 دلوقتى بقت كالحة

ليل

ويأخذك حزنك الى ابعد ما يطال الخوف فتأتنس بك دمعاتك فى ليل يطوى ما كان منك ومن جرحك فلا تدرك ايكما كان البادئ بالرحيل

بلا كون

ويشوف الكون من بلكون ع الجنب بعيد متعب وعنيد حالف لو يوم يرضى يصالح شمعى ما هايقيد وبشوف الكون واضح وبعيد وساعات بلكونى بيكون بلا.. كون

نور باهت

لمبه ونورها باهت مكسور ..
ولو انه ساعات يعنى يكون مغرور ...
بتغرق وسط بحر غويط ...
(عبيط) يا قلب متشعلق بضى
يتيم حزنك ومالهش زى

ضى

بخيل يا ضى لما بتأتنس بالليل
 و تمد حبال الكلام تخنق لمعتك بايديك
 و عكار الخوف بيعشش على جفونك ..
 فمد ايديك يا ضى للمستنى لحظة يشوف 
قلبه عليك يا ضى ولا عمره بيخونك

سبحة الايام بتكر... 
واللولى دمع جامد ف القلوب
 ينزل ع الارض يحكى
 يخبط ف الجرح يبكى
ايام وجعك لازم هاتمر

شرنقة

وبتسكت و تنسج م السكوت شرنقة ... 
يظنها الشايف درع للخايف ..
قلوب تاهت و متفرقة

فتافيت

ويوم ما خليت فتافيتك لكتاكيتك 
لاموك وظنوأ انه بخل ماليك 
ماعرفوش انه حزن ومحتويك
 وضياع بينك وبينك 
والم بينخر منك فيك