قلبين نونو

وعلقت قلبينى النونو ف رقبة سما

مبدورة  غيوم من غزل بنات  

مستنى ايدين تقطف ضيه 

وعيون حكايات

تستنى ايام حلوين  زيه

المرة دى براحك ابيض

مسكون عصافير

بيغنوا غنوة من السكر

و بتتكرر

مرة .... ومرة

شايف بكرة

و لا بتتونس بالتفكير ؟

خلصت مشاوير حيرة روحك

ولا الفرحة

حتة رسماية

و بالطباشير؟؟؟؟

رسائل القلب

للعاشقين  صلوات فخلوا بينى و بين العيون اذوب هوى ، والاحق الانفاس تبتلا و دمعا  حين انقسام القمر لؤلؤاونسيما فيهرع القلب بين الجهات الاربع  للحنين  و يسجد العمر  حمدا للذى جعل الرحيق مناهلا و اغانى ..

وللعيون حديث فصمتا يا من لا تدرك ان الحروف  سبيل وان السنا لا يغفر اللغو وتجاوز حدود الارتواء،  فضع بين كفيك /قلبيك  و تجاوز حدود الحكايات دون ان تلتفت .. فمن يرسل  البصر فى مقام النسيان فسوف يرتد اليه العمر وهو  كسيف ..شدو لا تبتغيه انت يا من تدرك انى حين الانصات ارسل رسائل القلب دونى فتاتينى باليقين .. و مقام السائر بينى وبينى  لا يسع اقاويل تجرح حنايا القلب حين الانكسار ولا تظننى  احسن  ارتياد الرجاء حين يشتد العطش و يحاصرنى  البكاء .

قصاقيص

وبيعلن مرسوم الامتلاك لشئ بنفسه قال "زاهده"

و يسلم موجه لموج ييجى بعدها وياخده

و بيرسم على وش الامل بسمة

ويجرى ورا اللى زمان  عانده ....

***

 وبينك وبينك سد /مافيش .. 

لا تتكلم باوجاعك 
ولا تنادى عليك/ ما تجيش 
بينك وبينك عيون بتبص
وما تشوفنيش
وبينك وبينك صبر جبال
اهرب هناك 
و ما تهديش

***

ومتغرب ما بين الوش متدارى

جوة القلب  متكسر /

وبين الوش /تخاف وتكش

مغصوب يبقى ده المنظر

ومن ساسك لحد الراس متكهرب

بشوق محموم  ..و ايه هايدوم؟

غير الحسرة تتمرر؟؟

***

ومالكش غير الصمت.... بتدارى اسواره 

وتوب الصبر   تتخلع من الحرقة ازراره ...  

وترسم ع الوش جملة  : انا زى الفل  

تكدب اكيد ع الكل ...ومن ضمنهم  نفسك ... 

عارفه انه من نفسك 

تكتب بالدموع السطرين ...

 تداوى القلب يوم اهتين  

تشكى  لمين زارك ... 

تاخد م البعيد تارك   

ولو يرجعوا الراحلين .... 

تقفل ف الوشوش بابك

خنقة قمر

خنقة قمر و انا الناوى على الترحال 


متعود اتونس بكام نجمة 

و اقول قسمة انى اتعكز على الموال ... 


فيوم بح الصوت و انهزم الضى للاسود 


مشيت برضه وخدت الوحدة م العزال 

زمان ... قالوا

زمان قالوا ... للشيخ البعيد كرامات

وقلوب العاشقين صفحات

بتتقلب / و نتعذب

لو حبستنا ف اللى فات ...

زمان قالوا ... و قلنا كتير 

بس العبرة ف الاخر

وياتكون لى لحدود روحك

او همشى و هتَاخر....

ذنب

شيفاك متوضى بذنبك الماضى

بتؤم روحك فى صلاة غائب

ف  محرا ب قلبك الفاضى

ف  < اكبَر> وامشى و قلبى مش راضى ...

يا ملونين جفنها لون الفرح اخضر 

ومفرحين قلبها نيلها دهو السكر 

هاتوا الايدين منقوشة بالحنة 

و خطوا لبكرة سكة ارضها .. احنا 

خايفة عليكى م الحسد يا مصر 

طلع فجرك بقيتى حتة م الجنة

كله ع الهامش

كله ع الهامش

باحساسى الغريب جدا انا شايف .. عكار القلب فى الضحكة وضلة خوفى ع السكة ومش   ساكتة  غربان القول ووسواسى .. انا ناسى .. وحدة روحى بين ناسى .. ضلال الشوف والادراك و مين ادراك.. وانت صحبتك  احزان يكون هو مهوش انسان .. مجرد حلم ع الماشى  وبيك ونسان .؟؟؟

كلام  محذوف ...

وشوق ملهوف لفجر ف يوم ما بيهلش .. يقسم دعوتك قلبين ..  مابين البين .. اعمى اوى صبرك  ما بيطلش .. ومين مانع  ومين بايع و مين سطرك ومين نقطة انتهاء شكك   ومين شكل حروف صوتك  ....مابتردش ؟؟؟

سهران القمر يسأل و لو تنده له يوم يتقل يخبى طروفه تحت البرد .. يشد لحاف يادوب ع القد   يصلى فرضك المنسى   على مفرق طريقك سد  ..

دارى الخيبة تحت رموش ما تدمعشى وما تسمعشى .. ولو ندهوا عليك    ياما ... اوعى ف يوم .. ما ترجعشى

خانك ضيها النجمة ف ساحة قلبك الفاضى و مش راضى  تقر بذنبها المعروف  منى روحك يطلع زمنك  القاسى .. اول متهم بالشوف   وانت المصطلى بالخوف  و بالحيرة  حامل شعلة امبارح ف ليل جارح ..  ما تتصالح!!  وافرد بكرة قدامك غيطان  الجى مادامك حى  ولا خلاص؟  نهش شكك ف روح الروح .. وغطا انينك المدبوح على صوتك .. معاد موتك  مهوش اعلان و لا تأكيد  لشئ ف الايد /ومش زاهد ..

وحد ربك المعبود و امشى ف خطك المرصود  مهوش باين صحيح الحد ما بين الظلم و المظلوم ما بين الفرحة و المحروم ما بين البكرة و وامبارح  ما بين كلمة تشق الغيم ما بين يأسك ف ساعة ضيم ما بين دوامة الراحلين ومين جايين ومين على ناصية وجع واقف  .