عقد لولي

 وكان عقد لولي وانفرط بدري....

وحزني ليل اسرار

ووجهك يا الحبيب...بدري

اتجمعوا العشاق

مفارق... ومش فارق

واللي لقضاه رايح.. يجري

واللي شبكاه الضفاير

واللي دمعها... ثاير.. غجري

شجن

 لحظة ما يختبر البراح صبرك فيضيق

وتنتفض. ما تساعك روحك

بوحك يا الغريب للبعيد غلطة

سكة مفروشة بجروحك

اغضب وامتثل لندا الايام 

واياك يسجنك في الهموم نوحك

الصبر ع الانكسار ذنب

تصنعه الاوهام

وما يغفره الا نصرتك..روحك

نفسك لا تهلك!!

وان جاك طوفان

خلي كلمتك رجليك..

ينجيك صدقك 

وان مالت عليك الايام ما تميل .

كتفك وان كترت عليك الاحمال..قادر

ولساك عفي 

ياللي خطوتك شالت كتير سكك ودروب 

ودمعك نور دنيا ما تستاهل 

وبا لساهل يتوجع الاصيل لكن 

ما يسلم للوجع قلبه بس لو عاقل!!

ولا تسال مجرب

 ولا تسال طبيب

غيب!!

جواك المرسي والشطوط 

جواك المشكلة والحل

والخل ..لا تعاتب

لسانك حصان حرنان

والصمت مش توبك

فلا السكوت دهبك 

ولا فضتك بوحك

ما بين البين مع روحك بتتشاور

ولو شاور في مداك الشوف

خلي سكتك قنديل

وما تقيدشي صوابع شمع

حتي للي يستاهل!

•

شيال الحمول

يا شيال الحمول جه الوقت 

تزيح الحمل عن روحك 

تريح فى الطريق لو ضل 

تداوى الصبر بجروحك

صبر

فلما اذن مؤذن ان حى على لقاء 
كان القمر دعاء يكتمل ، 
فلما راته  شمرت عن قلبها 
ودنت ... ففُتحت الابواب 
وفاضت عيناها 
ارتوت
شوق على شوق
فكيف للعاشق ان نقر عينه
 والصبر جرح لا يندمل

وكان ... شاعر

وكان( مسرور)... يدبح

سيفه الخشب قلبه

ف ينز ... عطور

 تعطر ليل قلوب غافيه

وماليها غرور

وكان عصفور

 يزقزق فوق نواصيهم

ويبكيهم

ويديهم

ف الضلمة بدور

وكان قصة

بتحكيهم

تطير بيهم

بجناح مكسور

على الدكة

يا اما اشتهت خطوتى تلقى لعينيك سكة .. 

تمد بوحك غناوى .. تملا القلوب ضحكة  

عبرت ليك القنانى بقلب غاوى

لقيتنى فى لعبتك ,, 

مركون على الدكة

بلياتشو 2

وعينيه المذلولة ما بتشوفشي

و(حمار) !!!

بيعدي لهاليب النار

حرقت روحه

وما صرخشي

نشانه هزار

تايهة (عباراته)

ما بتصيبشي!!!

شاعر؟

بلياتشو؟

سراب تايه؟

انا ما اعرفشي


******


ف القعدة كان درويش

وكان ساحر

وكان قادر 

ع السعي بين صفا زايل

وبين قسوة

وكان يطربه التسقيف

وكان ف مشيه ع الاحبال

ولد حريف

لكن جمهوره كان مشغول

ومش مسئول

عن قلب و حرفته المه

يلون بالكلام همه

ويرسم ع الوشوش بكرة

بلياتشو 1

كام منا صحيح خانها

دمعة البلياتشو المقتول حزنا ..

فى اخر ضحكة الجمهور ...

****

و الشاعر صحيح فنان

لكن حرفة جمال صوته

ما نعة حروفه تتحرر

من سجن الغنا الدافى

فتوصل حرقة الصرخة

لابعد حد للاصرار

يبوح/ ساكت

ينوح / متبسم الدمعة

ف وش قرار

مانيش راجع !!

يا اغلى حته من قلبى

يا شوق و مرار ..

وفوق ترابيز صحيح عالى

لكن واطية اوى حيطته /

باينة كمان اوى خيبته

هايتنطط

وهاتسقف ايدين باردين

ومش شايفين

غير لحظة و هاتعدى

يسقط !!

ومين يهتم

يعلا ..

صحيح ع الغم !!

ومش فارق ...

لكن عدا ..!!